Халықтың үш биді сынауы.
Ордабасында бас қосқан бір үлкен жиында Төле, Қазыбек, Əйтеке билерге:
-Сіздерден тілейтініміз есте жүрер бір-бір ауыз сөз айтсаңыздар – дейді жиналған игі жақсылар.
Бірінші сөзді Төле би алып
-Биікке шықсаң көзің ашылады. Жақсы мен жолдас болсаң зейінің ашылады. – деген екен.
Қаз дауысты Қазыбек би:
-Аты жаманның арманы кетеді.
Баласы жаманның дəрмені кетеді.- дейді.
Іле сөз кезегін Əйтеке би жалғастырады.
-Алланың қалағаны – азан.
Пенденің қалағаны – қазан. -деген екен.
Жұрттың біразы: – Төле озды – деп шуласа, тағы бір тобы – Қаз дауысты Қазыбек озды – деп өздерінің пікірін білдіреді. Үшіншілері \”Əйтеке озды\” деп таласады.
Сонда Қойгелді батыр билік айтқан екен:
Жұртым-ау, үш би де аталы сөз айтты ғой. Үш данадан шыққан үш нақыл сөз бәріміз үшін қазына ақыл ғой. Үш топқа бөлінуде артында үш жүзге бөліну жатпасын ! Өз ағайындарымыздың ғана аты озсын деп жүйріктерін шылбырдан сүйреп, сауырға қамшы сілтеген мін емес пе ? Қызыл көз қызғаншақтық деген итке таланғанша \”Бəрі озды\”, \”біз оздық\” десеңіздер шын емес пе ?! Соны айтуға ауыздарыңыздың икемді келмей тұр ма, əлде жүректеріңіз дауламай тұр ма ? деген екен мысқылдай күліп …
Дереккөз: Ел аузынан.
Мақала авторы: Сұраш Ұзақбай Арапбайұлы
Поштасы 24122019n@gmail.com